28- July-2023
Sida ay muujinayaan muuqaalo lagu baahiyay baraha bulshada, jabhaddan oo aad u hubaysan aya isku aruursaday buurta Gacan-Libaax ee deegaanka Go’dawayn oo u dhaxeysa magaalooyinka Hargeysa iyo Berbera.
Maleeshiyaadkan hubeysan ayaa la sheegay inay deegaan ahaan kasoo jeedaan beel deggan aagga ay ku taallo buurta Gacan-Libaax, ayada oo todobaadyadii la soo dhaafay ay halkaas ku aruursanayeen ciidamo si ay u ballaariyaan cududooda ciidan.
Jabhaddan oo ciidanka ay haysato tiradooda si rasmi ah weli loo xaqiijin ayaa la baxday magaca “Dulmi-diid”, iyaga oo sheegay inay kasoo horjeedaan xukuumadda Somaliland ee uu hoggaamiyo madaxweyne Muuse Biixi Cabdi.
Inkasta oo ay jabhaddu faah-faahin ka bixin waxay ula jeedo magaca ay la baxday ee “Dulmi-diidka”, haddana waxaa soo baxaya warar sheegaya in ay ka gadoodsan yihiin arrimaha siyaasadda ee la isku hayo gudaha Somaliland oo ay ugu horreyso doorashooyinka, xilli ay dhawaan guddiga doorashooyinka ay soo saareen jadwal doorasho.
Jabhaddan ayaa la sheegay in ay si iskooda ah wax uruursadeen, sidoo kalena ay taageero dhaqaale ay ka heleen qaar kamid ah qurbajoogta ay isku deegaanka yihiin, kuwaasi oo dibedda ka wadda olole dhaqaale loogu aruurinayo jabhadda farriisinta ka dhigatay buurta Gacan-Libaax
Sameysanka jabhaddan ayaa durba lagu eeedeyay xukuumadda Somaliland, ayada oo xisbiga mucaaradka ah ee Waddani uu sheegay in sabab u tahay maamul xumada madaxweyne Muuse Biixi, taasi oo keentay gadoodka dadkaan, sida uu ku sheegay qoraal uu soo saaray.
Si kastaba, Somaliland ayaa haatan wajaheysa xaaladdo is biirsaday, sida dagaalka Laascaanood iyo sidoo kale muran ka dhashay doorashooyinka kusoo foodka leh maamulka, kaasi oo uga sii darey go’aankii dhawaan kasoo baxay guddiga doorashooyinka ee uu ku sheegay in doorashada xisbiyada ay kasoo horeynayso midda madaxtooyadda