2- July-2023- Muqdisho
Wasiirka Dastuurka iyo Caddalaadda dowladda Federaalka Soomaaliya Xasan Macallin ayaa u ballanqaaday maxaabiista ku xiran xabsiga dhexee Muqdisho inay si degdeg ah cadaalad u heli doonaan,Xasan Macallin ayaa sheegay inay billaabeen baaritaan la xiriira maxaabiis uu taliyaha Asluubta Jeneraal Mahad Cabdiraxmaan oo loo yaqaan Taliye Shub uu ku sheegay in muddo 10 sano ah ay xabsiyada ku jiraan iyagoo aan maxkamadi xukumin.
Waxaan idinkugu nimid in caddaaladdu sugnaato oo aad caddaalad heshaan. Waxaan heynaa dambiga aad ku eedeysan tihiin” ayuu Xasan Macallin u sheegay koox maxaabiis ah oo uu la hadlayay, sida ay baahisay warbaahinta dowladdu.
Wasiirka oo qiray inay jiraan maxaabiis dhaafay muddadii sharcigu oggolaa in xabsiga lagu hayo maxkamad la’aan -ayaa dhinaca kale dafiray hadalkii taliye Shub ee ahaa inay jiraan maxaabiis 10 sano xiran, iyaga oo aan maxkamadi xukumin.
“Hadalkii taliyaha waxaan u qaadaneynaa qeylo-dhaan. Ma jirto cid dhaaftay 10 sano” ayuu yiri Wasiirka Dastuurka iyo Caddaaladda Xasan Macallin.
Waxaa booqashadiisa Xabsiga Dhexe ku wehliyay xubno uu ka mid ahaa Xeer Ilaaliyaha Guud ee dalka Sulaymaan Maxamed Maxamuud iyo xubno kale oo ka socday garsoorka iyo maxkamadaha.
