Daaha Cabdi Cali waa cayaartoy Kubadda cagta cayaara oo 26 jir ah. Wuxuu ku dhashay caasimadda Sweden ee Stockholm 1 Luulyo 1998. Waalidkiis waxay ka soo qaxeen Soomaaliya sannadihii 90-meeyadii. Wuxuu hadda u cayaaraa kooxda Malmo FF ee ka cayaarta Europa League.
Laakin waxaa isha ku haysa koox ka cayaarta horyaalka Ingiriiska ee Premier League. Sababaha ay ku doonayaan cayaartoygan ayaa lagu sheegay in uu yahay nin difaacyada ka soo horjeeda jebiya oo balka ka dheela.
Wuxuu ka mid yahay Daaha cayaartoyda durba la safo ee kooxda Malmo ku xisaabtanto, wuxuuna ku fiican yahay dhalinta iyo dhigidda goolasha, taana waxay keentay inuu qayb muhiim ah ka qaato kaalinta ay kooxdiisa kaga jirto horyaalka Sweden ee 2024 oo ay ku hogaaminayso 61 dhibcood, waxaana kooxda ku soo xigta ee Hammarby ay leedahay 53.
Maalmo FF waa kooxdii uu cayaaraha ka soo bilaabay laacibka reer Sweden ee Zlatan Ibrahimovic, waana kooxda hadda difaacanaysa horyaalka.
Kooxda Brighton ee horyaalka Premier league-ga Ingiriiska kaga jirta kaalinta 6aad ayaa aad u danaynaysa ciyaartoygan, sababahana waxaa ugu weyn ayadoo doonaysa cayaartoy dhallinyar oo xirfad sare leh, buuxinna kara qaybta weerarka ee kooxda.
Waxaa kale oo Brighton ay doonaysaa ciyaartoy adag oo u geli kara kaalintii uu baneeyey Leandro Trossard oo kooxda uga wareegay kooxda Arsenal sannadkii hore. Daaha waxaa aad loogu jeclaaday Khalkhal gelinta difaaca ka soo horjeeda.
Intaa waxaa dheer in kooxda Brighton lagu yaqaanno inay soo qaadato ciyaartoy ay u aragto inay mustaqbal fiican leeyihiin, kuwaasoo soo bandhiga hibo rabaani ah, una diyaarsan inay horumar sameeyaan.
Haddaba waa kuma Daaha cali. Waa 26 weerarka ka cayaara, wuxuuna kubadda cagta bilaabay markii uu 8 jir ahaa, isagoo ku soo koray xaafadda Testa ee magaalada Stockholm. Kooxdii ugu horreysay ee uu u cayaaro waxay ahayd Spånga IS oo wakhtigaas ahayd koox ka dheesha heerka 5aad.
Dabayaaqadii 2013, Daaha Cali wuxuu ku biiray kooxda Sundbybergs IK isagoo wakhtigaas ahaa 15 jir. Kooxda oo ka dheesha heerka 2aad ayuu Daaha u saxiixay 3 gool 11 cayaarood oo uu u safatay.
Daaha wuxuu uga sii gudbay kooxda IFK Stocksund oo muddo 2 sano ah uu u cayaaray, ka dibna xilli ciyaareedkii 2020 wuxuu heshiis la saxiixday kooxda Sollentuna FK, isagoo u dhaliyey 10 gool, isla markaana suurto geliyey dhalinta goolal badan oo uu badankood dhigay horyaalka heerka Ettan Norra ee Sweden oo kooxdiisa Sollentuna ay kaalinta 3aad ku dhamaysatay.
Bishii Febraayo, Daaha Cali wuxuu heshiis 3 sano ah la saxiixday kooxda Örebro SK. Waana markii ugu horreysay ee uu ka dheelo horyaalka 1aad. Cayaartii ugu horreysay ee uu safto ayaa ahayd 24 Maajo 2021, taasoo kooxdiisa guul darro 2-1 ah ay dhabarka u saareen Malmo FF. Cayaartaas waxaa Daaha garoonka la soo geliyey daqiiqaddi 84aad.
Muddo ka dib, bishii Agoosto ayaa Daaha waxaa deyn ahaan lagu siiyey kooxda Vestaras SK, isagoo u dhaliyey 2 gool, 8na caawiyey 15 cayaarood oo uu dheelay, wuxuuna gacan ka gaystay in kooxda aysan ka bixin horyaalka Superettan. Isla sannadkaas wuxuu ku guulaystay abaalgudka VLT.
Bishii Janaayo 2023 ayuu daaha ku biiray kooxda uu hadda u dhee lo ee Malmo FF, dabayaaqadii sannadkana wuxuu kooxda la qaaday koobkii horyaalka.
Haddii uu u soo wareego kooxda Brighton wuxuu noqon doonaa cayaartoygii 2aad ee Soomaali ka soo jeeda ee ku biira kooxaha horyaalka premier league, wuxuuna fursad u heli doonaa inuu foodda daro qaar ka mid ah difaacyada ugu adag, uguna magaca dheer caalamka sida Van dijk, Rodri, Saliba, iyo Casemiro.
