28″ July ” 2021″ Hirshabeele
Madaxweynaha dowlad Goboleedka Hirshabeelle Cali Cabdullaahi Xuseen Guudlaawe ayaa maanta Magaalada Muqdisho kulan kula qaatay Safiirka dowladda Turkiga u fadhiya Soomaaliya Ambassador Mehmet Yılmaz.
Madaxweyne Guudlaawe iyo Ambassador Mehmet Yılmaz ayaa kulankooda uga wada hadlay Arrimo kala duwan oo kamid yihiin amniga iyo Doorashooyinka dalka ka dhacaya gaar ahaan doorashada Aqalka Sare ee Baarlamaanka Federaalka.
Labada Mas’uul ayaa waxaa kaloo ka wada hadleen inta uu socday kulanka, wax ka qabashada Fatahaadaha Webiga Shabeelle oo saameyn weyn ku yeeshay boqolaal qoys oo kunool deegaano ka tirsan Maamulka, Maalgashiga deegaanada Hirshabeelle iyo shaqo abuur Dhalinyarada.
Madaxweyne Cali Cabdullaahi Xuseen Guudlaawe ayaa Safiirka dowladda Turkiga u jooga Magaalada Muqdisho uga mahadceliyay dadaalada wax tarka leh ay la garab taagan yihiin dadka Soomaaliyeed.
Maamulka Hirshabeele oo Hakiyay Magacaabista Guddiga Doorashada Aqalka Sare maxay tahay sababata?
Warar lagu kalsoonaan karo oo la helayo ayaa waxaa ay sheegayaan in Guddoonka Baarlamaanka dowlad Goboleedka Hirshabeelle uu hakiyay magacaabida xubnaha Guddiga qabanaya doorashada Aqalka Sare ee Baarlamaanka Federaalka.
Ilo ku dhow Xafiiska Guddoomiyaha Baarlamaanka Hirshabeelle Cabdixakiin Luqmaan Maxamed ayaa sheegaya in sababta Guddoomiyaha u hakiyay magacaabida Guddiga ay la xiriirto Baasaboorka Diblomaasiga oo loo diiday Xildhibaanada Baarlamaanka Hirshabeelle.
Lama oga xiliga Guddoonka Baarlamaanka Hirshabeelle uu soo magacaabi doono xubnaha Guddiga ee qabanaya doorashada Xildhibaanada Aqalka Sare ee Baarlamaanka Federaalka Soomaaliya.
Maamulada Puntland, Galmudug iyo Hirshabeelle ayaan weli soo magacaabin xubnaha Guddiga qabanaya doorashada Aqalka Sare, halka Maamulka Koonfur Galbeed uu shalay magacaabay Guddiga oo ka kooban 11-xubnood.
Maamulka Jubbaland ayaa noqday maamulkii ugu horreeyay ee magacaabay xubnaha Guddiga doorashada, waxaana xusid mudan in berri Kismaayo lagu qabanayo doorashada Aqalka Sare, kadib markii Maanta la diiwaan-geliyay Musharaxiinta tartameysa.
