Wararka ka imanaya magaalada Jowhar ayaa sheegaya in ciidamo ka tegey magaalada Muqdisho ay gaareen maanta magaalada Jowhar ee xarunta dowlad goboledka Hirshabelle.
Ciidamadan oo safar dhulka ah uga baxay magaalada Muqdisho ayaa maray waddo aan ahayn wadada laamiga ee isku xirta magaalada Muqdisho iyo Jowhar.
Lama oga ujeedka ay ciidamadan ay u gaareen magaalada Jowhar hase yeeshee waxaa maalmihii la soo dhaafay soo baxayay warar sheegaya in la bilaabayo ololaha doorashooyinka dowlad goboledka Hirshabelle oo muddo xileedkiisu uu dhow yahay.
Magaalada Jowhar ee xarunta dowlad goboleedka Hirshabelle ayaa waxaa ka maqan haatan saddexda mas’uul ee ugu sareysa sida Madaxweynaha, Madaxweyne ku xigeenka iyo Guddoomiyaha Baarlamaanka iyo ku xigeenkiisaba.
Mas’uuliyiintan ayaa ku sugan magaalada Muqdisho waxaana soo baxayay warar iskhilaafsan oo ku saabsan in Maamulka Hirshabelle uu doonayo in muddo kordhin sameeyo.
Haseyeeshee ciidamadan ayaa markii ay gaareen sh/dhexe waxa howlgal qorsheysan ay ka sameeyeen wadada laamiga ah ee u dhexeeysa Magaalooyinka Jowhar iyo Muqdisho.
Ciidamada ayaa halka loo yaqaano Ceel-geeloow ee Gobolka Shabeellaha Dhexe ku dilay saddex xubnood oo ka tirsan Al-shabaab, kuwaasi oo la sheegay inay miino ku aasayeen wadada.