26″ May” Wednesday “2021 ” New York
Golaha Ammaanka oo walaac ka muujiyay go’aanka dowlada ay ku diiday Ergeyga Midowga Afrika
Wakiilka Gaarka ah ee Xoghayaha Guud ee dalka Soomaaliya James Swan ayaa khudbad dheer uu ujeediyey maanta Golaha Amaanka waxa uu ugaga hadlay xaalada Soomaaliya.
James Swan oo khudbadan jeediyay kadib hadal uu u jeediyay Wasiirka Arrimaha Dibbada Soomaaliya Maxamed Cabdirizaq Golaha ammaanka iyo Wakiilka Gaarka ah ee Guddoomiyaha Midowga Afrika ee Soomaaliya, Danjire Francisco Madeira ayaa ugu horeyntii waxa uu ku ammaanay ciidamada AMISOM howlgalada ay dalka Soomaaliya ka wadaan.
“Waxaanan ku amaanayaa geesinimada iyo go’aan qaadashada ciidamada Soomaaliya iyo kuwa AMISOM maadaama ay horumar ka sameynayaan nabadda iyo amniga dalka.”ayuu yiri Swan.
Waxa uu ka warbixiyay maraxaladihii ay soo martay siyaasada dalka gaar ahaan arrimaha la isku khilaafay ee doorashooyinka. Waxana uu soo hadal qaaday muddo kororsigii uu Golaha Shacabka isku dayay.
“Geedi socodka siyaasadeed ee lagu hirgalinayo doorashooyinka Soomaaliya ayaa bilihii lasoo dhaafay la kulmay caqabado badan. Wadahadalkii udhaxeeyey Dowlada Federaalka iyo hogaamiyaasha Dowladaha xubnaha ka ah Dowlada Federaalka oo bilowday bishii Maarso ayaa si nasiib daro ah u burburay horaantii bishii April. Golaha Shacabka ee Baarlamaanka Soomaaliya ayaa markaa kadib ansixiyay “Sharci Gaar ah” oo baabi’inaya heshiiskii doorashada ee 17-kii Sebtember, iyadoo dib loogu noqonayo qaab hal qof iyo hal cod ah, iyo in loo kordhiyo waqtiga howl-wadeennada xafiiska hadda jooga illaa laba sano oo dheeri ah. Ka soo horjeedka talaabooyinkan waxay keeneen abaabul maleeshiyo iyo kala qaybsanaan soo dhex gashay ciidamada amniga Soomaaliya. Isku dhacyo gacan ka hadal ah ayaa ka dhacay 25-kii Abriil.”ayuu yiri James Swan.
Wakiilka Xoghayaha guud ee Qaramada Midoobey u qaabilsan Soomaaliya James Swan ayaa sheegay in ay tahay arrin aad looga welwelo in dowladda Soomaaliya ay diiday ergeygii Midowga Afrika ay u soo magacoowday Soomaaliya, Mudane John Mahama
James Swan ayaa shalay ka hadlay kulan gaar ah oo Golaha Ammaanka ka yeeshay arrimaha Somaaliya ayaa ku tilmaamay go’aankaas inuu ahaa mid aan wanaagsanayn.
“Waxaa si weyn uga qoomameyneynaa go’aanka dowladda Soomaaliya ay ku diiday ergeygii Midowga Afrika usoo magacaawday Soomaaliya.”ayuu yiri James Swan.
Go’aankaas kadib, John Mahama wuxuu sheegay in uu isaga laabtay tallaabadii Midowga Afrika ugu soo magacaawday in uu noqdo ergeyga gaarka u qaabilsan Soomaaliya isla markaana wuxuu hakiyay shaqadaas.
Xayeeysiin
Arrimaha doorashada
Swan ayaa ugu baaqay madaxda Soomaalida inay isu tanaasulaan si heshiis looga gaaro khilaafka arrimaha doorashada.
“”Waa muhiim in shirka ka socda Muqdisho uu ka soo baxo qodobo la fulin karo si doorashada loogu qabto waqtiga ugu yar ee suurtagalka ah, waxaan amaanayaa dhammaan hoggaamiyeyaasha Soomaaliyed ee doonayay tanaasulka iyo is afgaradka inta lagu guda jiro xilligan, taasoo ay ku jirto danta dalka iyo dadka Soomaaliyeed. arrinta tanaasulka ayaa weli ah arrin degdeg loogu baahan yahay si horay loogu sii socdo” ayuu yiri James Swan.
Warbixin gaar ah oo ay Qaramada Midoobay ka diyaarisay xaaladda Soomaaliya ayaa lagu sheegay in go’aankii muddo kororsiga ee 12-kii April uu dalka geliyay xasilooni daro baahsan iyo kala qeybsanaan siyaasadeed, balse waxaa aad loo bogaadiyay ka laabashadii uu madaxweyne Farmaajo codsaday.
Dowladda Soomaaliya ayaa Qaramada Midoobay u sheegtay in lagu heshiiyay shirkii arrimaha doorashada ee ka socday teendhada Afisiyoone ee Muqdisho.
Wasiirka Arrimaha Dibeda Soomaaliya Maxamed Cabdirisaaq oo ka hadlayay shir gaar ah oo Golaha Amniga ee Qaramada Midoobay ayaa sheegay in isfaham buuxa laga gaaray dhammaan arrimihii laga wada hadlay, islamarkaasna shirka lasoo afmeeri doono maalinta khamiista.
Waxa uu wasiirka si gaar ah uga hadlay khilaafkii ka taagnaa xildhibaanada Waqooyiga, wuxuuna sheegay in ay kulan yeesheen guddoomiyaha Aqalka Sare Cabdi Xaashi Cabdullaahi iyo Ra’isulwasaare ku xigeenka Mahdi Guuleed, iskuna afgarteen qaabkii loo wajihi lahaa doorashada xildhibaanada Waqooyiga.
Haseyeeshee Wasiirka ma uusan faahfaahin waxyaabaha rasmiga ah ee lagu heshiiyay.
Amniga
Wuxuu sheegay xaaladda amniga ay tahay walaaca ugu weyn.
Swan ayaa sheegay in Al Shabaab ay yihiin halista dhabta ah maadama ay qaadayaan weeraro bartilmaameed ah guud ahaan Soomaaliya.
Wuxuu sheegay in Qaramada Midoobey iyo Midowga Afrika ay sii wadaan howsha ku aadan dhismaha ciidamada iyo sidii dib u habeyn loogu sameyn lahaa howlgalka nabad ilaalinta ee Amisom.
Xaaladda bani’aadanimo
Qaramada Midoobey waxay sheegtay in 5.9 qof oo ku nool Soomaaliya ay u baahan yihiin gargaar banii’aadnimo sanadkan.
Boqolkiiba 80 dadka ku nool dalka waxaa saameeyay dhibaatada ka dhalatay abaaraha.
Swan ayaa ugu baaqay dalalka xubinta ah Qaramada Midoobey inay kasoo qeybqaataan dadaallada wax looga qabanayo xaalaadda banii’aadanimo ee Soomaaliya.
