Ergeyga gaarka ah ee Xoghayaha guud ee Qaramada Midoobay James Swan ayaa qudbad ka jeediyay maanta munaasabadda xuska maalinta Qaramada Midoobay
Qudbada kadib ayaa su’aalo la weydiiyay James Swan waxaa ka mid ahaa ciidamada Maraykanka ee la sheegay in laga saarayo dalka Soomaaliya,waxana uu ku jawaabay in su’aasha ay tahay in la weydiiyo dowlada Maraykanka.
Halkan hoose ka aqriso qudbada uu jeediyay Wakiilka Qaramada Midoobay ee Soomaaliya James Swan;
Intii lagu gudo jiray xuska maalinta Qaramada Midoobay, waxa ay ergada Qaramada Midoobay ee Soomaaliya muujiyeen xiriirka ka dhexeeya hey’adaha dalka iyo kuwa caalamka, iyaga oo xaqiijiyey in ay garab taaganyihiin Soomaaliya maanta iyo berriba.
“Inkastoo oo aan maanta xuseyno maalinta Qaramada Midoobay, balse waxaan halkaani u joognaa garabsiin. Waxaanu halkaani u joognaa iskaashi, qaas ahaan in aanu caawino hay’adaha Soomaaliyeed, Dowladda Soomaaliya, Maamul Goboleedyada iyo hay’adaha kale ee halkaan u jooga in ay dadka caawiyaan” waxaa sidaa yiri Wakiilka Gaarka ah ee Xoghayaha Guud ee Qaramada Midoobay u qaabilsan Soomaaliya, James Swan
“Waxaa naga go’an in aan si xoog leh u wada shaqeyno islamarkaana iswaafajinno waxyaabaha Qaranka u leh hortabinta” ayuu ka yiri shir lagu qabtay magaalada Muqdisho.
Laga soo bilaabo 1945-tii, marka ay taariikhdu ku beegantahay 20 Oktoobar sanadkasta waxaa la xusaa maalinta Qaramada Midoobay; waxa ay ku beegan tahay sanad-guuradii ka soo wareegtay markii la dhaqan-geliyey Axdiga Qaramada Midoobay ee 1945. Markii la ansixiyay dukumiintigan aasaasiga ah oo ay qeybta ka yihiin shanta xubnood ee joogtada ah ee Golaha Amniga ee Qaramada Midoobay, waxaa si rasmi ah u bilawday hawlihii Qaramada Midoobay.
Hadal jeedintiisi, waxa uu ka hadlay Ergeyga QM doorarka kala duwan ee hay’adda Qaramad Midoobay kuwaas oo mideeya xirmooyin mabaa’dii ah oo ku jira Axdiga Qaramada Midoobay iyo galalka kale ee sharciyada tilmaama sida wadamada isu dhexgali karaan oo ay si wadajir ah uga mira dhalin karaan yoolashooda, isu keenidda kooxo hay’adeed oo u leh khibrad meelaha ahmiyada u leh horumarka aduunka, iyo doorka ay ku leedahay isu keenidda wadamada iyada xubnaha ka ah si loo qaato go’aanno mideysan.
Iskaashii waqti dheer ah
Mudane Swan waxa uu xusay in Soomaaliya ay qeyb ka ahayd Qaramada Midoobay kahor inta aysan xorriyaddeeda qaadan, halka hay’adda ay saaxiib dhaw la ahayd Soomaaliya.
Soomaaliya waxa ay xubin buuxda ka ahayd Qaramada Midoobay tan iyo markii ay xorriyadda qaadatay 60 sano ka hor. Soomaaliya iyo Qamada Midoobay ayaa soo wada shaqeeyay, Qaramada midoobay waxa ay Soomaaliya ka taageertay xorriyaddii ay qaadatay sanadkii 1960” ayuu yiri.
