1- September-2023
Laanqeyrta Cas oo booqatay boqolaal maxaabiis Somaliland ah oo ku xiran magaalada Laascaanood
Hay’adda Laanqeyrta Cas ee Caalamiga ah (ICRC) ayaa booqashadeedii ugu horreysay ugu tagtay in ka badan 300 oo maxbuus Somaliland ah oo ku jira xabsi yaalla magaalada Laascaanood
Dagaalyahanada la xirxiran ayaa lagu soo qabtay dagaaladii u dambeeyay ee dhex maray ciidamada Somaliland iyo ciidamada Khaatumo ee SSC oo dhacay dhamaadkii todobaadkan.
ICRC waxay booqataa maxaabiista labada dhinac ee dirirtu dhexmartay, iyadoo hore u booqatay xabsiga dhexe ee Hargeysa, halkaasoo ay ku jiraan maxaabiis ka soo jeeda SSC Khaatumo oo aan tiradooda la sheegin balse loo maleeynayo ku dhawaad kontomeeye dagaalame
Ujeedada booqashooyinkan ayaa ah mid bini’aadantinimo oo keliya, iyadoo ujeedadu tahay in dhammaan maxaabiista loola dhaqmo si bini’aadantinimo iyo in qoysaskooda ay ogaadaan halka ay ku sugan yihiin.
“Waa muhiim in maxbuus kasta, labada dhinac, loola dhaqmo si waafaqsan sharciga caalamiga ah ee bani’aadamnimada.
Tani waxay ka dhigan tahay in qof kasta oo xiran uu heli karo cunto iyo biyo, waana inaan marnaba la kulmin si xun oo loola dhaqmo,” ayuu yiri Pascal Cuttat, madaxa wafdiga ICRC ee Soomaaliya.
Si loo wanaajiyo xaaladaha xabsiga, kooxaha ICRC waxay sidoo kale gaarsiiyeen bustayaal iyo furaashyo meelaha lagu hayo ee Laascaanood.
Hay’adda Bisha Cas oo kaashanaysa Hay’adda Bisha Cas ee Soomaaliyeed (SRCS) ayaa sidoo kale fududaysay in afar maxbuus oo dhaawac ah loo soo wareejiyo Isbitaalka Qaran ee Garoowe, halkaas oo lagu daweyn gaar ah.
Dagaaladii ka dhacay Laascaanood iyo nawaaxigeeda awgeed, dad badan oo rayid ahi waxay waayeen xidhiidhkii ay la lahaayeen xubnaha qoyskooda. “Inaan la ogeyn waxa ku dhacay eheladooda waxay dadka ku keenaysaa murugo aan la qiyaasi karin,” ayuu yiri Axmed Saciid, oo kormeera howlaha ICRC-da ee waqooyiga dalka. “Xafiisyadayada Hargeysa iyo Garoowe, oo ay weheliyaan SRCS, waxay isku dayayaan inay dadka ka caawiyaan inay helaan xubnaha qoyskooda.”
Dagaal u dhexeeya ciidamada Somaliland iyo SSC Khaatumo ayaa billowgii sanadkan billowday, kaasoo sababay in boqolaal kun oo qof ay ka barakacaan guryahooda.
Magaalada Laascaanood ee xarunta gobolka Sool ayaa ah halka ugu badan ee uu dagaalku ka socdo, waxaana ka dhashay burbur baahsan oo soo gaaray kaabayaasha dhaqaalaha.
ICRC-da iyo SRCS waxay ku taageereen cusbitaallada aagga sahay caafimaad si ay uga caawiyaan daawaynta dhaawacyada. Isla mar ahaantaana, qaybta jawaabta ambalaaska ee SRCS waxay samaysay kala-soocidda safka hore, iyada oo bixisay daawayn bilow ah, ka dibna u qaaday dadka dhaawaca ah daryeel caafimaad.
Toddobaadkii la soo dhaafay, 110 qof oo dhaawac ah ayaa loo daabulay isbitaalka, halka 42 meyd ah la soo aruuriyay si ay gacan uga geystaan sidii si sharaf leh oo habboon loo aasay.
