8- August-2023
Maxkmadda dastuuriga ah ee Puntland ayaa qoraal ku taariikheysanaa maalintii shalay ee 7 Agoosto, 2023, u gudbisey garyaqaanka Guud ee Dowladda Puntland Maxamed Yuusuf Maxamuud.
Qoraalka Maxkamadda dastuuriga ah ee Puntland oo ku saxiixnaa guddoomiyaha maxkamadda Dr Xasan Yuusuf Nuur ayaa lagu sheegay in cabasho uu qareen ka yahay Abuukate Cabdijaliil Siciid Xaashi isaga wakiil ka ah Madasha ay ku midoobeen qaar ka mid ah siyaasiyiinta mucaaradka ah ee Puntland uu jawaab ka soo bixiyo garyaqaanka guud ee Puntland
Cabashada ayaa lagu sheegay in la xiriirto wax ka bedelka dastuurka iyo doorashooyinkii goloyaasha deegaanka, kuma cadda qoraalka maxkmaddu dirtey in muddo loo qabtey garyaqaanku uu ku soo jawaabo.
Maxkamadda dastuuriga waxaa yaala kiis kale oo weyn oo uu soo gudbiyey urur siyaasadedka mucaaradka ah ee Mideeye, kaas oo ku saabsan wax ka beddelka dastuurka lagu sameeyey ilaa 11 qodob.
Madaxweynaha Dowladda Puntland Siciid Cabdullaahi Deni ayaa wararku sheegayaan in uu ku jiro difaaciisi u danbeeyey ee arrimaha doorashooyinka, kadib markii dastuurka laga beddeley ilaa 10 qodob oo qaarkood xiriir la lee yihiin doorashooyinka, waxaana uu xiriir la sameeyey qaar kamid ah garsoorayaasha maxkmadda dastuuriga ah.
Urur siyaasadeedka Mideeyey ayaa dacwad ka dhan ah wax ka beddelka dastuurka u gudbiyey maxkmadda dastuurka, ururkan ayaa doodiisu salka ku haysaa, intaan doorashada la gelin in ay ahayd waxka beddelka la sameeyo, laakiin shuruuc doorasho lagu galay, inaan dastuurka loo beddeli karin si natiijadaloo beddelo.
Madaxweyne Deni ayaa xiriir toos ah la sameeyey qaar kamid ah xubaha maxkamadda dastuuriga kuwaas oo diidey in aan magacooda soo xigano, waxaana uu ka codsadey in aysan waxba kama jiraan ka soo qaadin wax ka beddelka dastuurka, arrintan ayaa noqon karta mid denbi ah haddii ay cadaato oo kiis maxkamad yaala aan awood loo adeegsan akrin in la hor istaago (obstruction of justice).
Maxkamadda dastuuriga ah ayaa ka kooban 9 garsoore, waxaana marka ay dacwadda qaadeyso guddoomiye u noqonaya isla guddoomiyaha Maxkamadda sare.
Maxkamadda dastuurka ee Puntland oo codsi u dirtey Garyaqaanka guud ee dowladda
Warar Horseed Media soo gaarey ayaa sheegaysa in maxkamadda dastuurigu aysan ku qanacsaneyn qaabka xildhibaanadu u mareen hindisaha waxka beddelka dasuurka iyada oo markii hore guddoomiyaha golaha wakiiladu soo weydiiyey fasiraad sharci, Maxkamadda ayaa sheegtey qodobka 46 farqadiisa saddexaad ay xukuumaddu soo jeedisey wax ka beddelkiisa taasna u martey sifo sharci ah, laakiin Baarlamaanku uu ku darsadey qodobo kale oo badan oo aan xiriir la wadaagin qodobka 46, dhanka kale Maxkamaddu dastuurigu ma sheegin qodobka waxka beddelka lagu sameeyey xiliga uu dhaqan gal noqonaayo, taas oo dooda ururka Mideeye salka ku hayso.
Waxaa lagu wadaa maalmaha soo socda in Maxkamaddu kiiskan go’aan ka gaarto.
Maxkmadda dasuuriga ayaa ka kooban
Xassan Yuusuf Nuur Guddoomiyaha Maxkamadda Sare
Axmed Sheikh Cumar Xassan Guddoomiye ku xigeenka maxkamadda sare
Sh. Saciid Axmed Faarax – Garsoore.
Maxamuud Cawad Cumar – Garsoore.
Saciid Maxamuud Maxamed – Garsoore.
Garsoore Ismaaciil Cabdullahi Cilmi
Garsoore Aadan Cumar Maxamed
Axmed Xuseen Maxamed
Garsoore Cali Cabdiraxmaan Maxamuud ( Qaanuuni)
