24″ January “2023
Waa maxay sababta Koonfur Afrika ay dhexdhexaad uga tahay dagaalka Ukraine iyo Ruushka
Mareykanka ayaa dhaleeceeyay go’aanka Koonfur Afrika ee ah in dhoolatus milateri ay bisha soo socota la sameyso Ruushka iyo Shiinaha, iyadoo dagaalka Ukraine uu sii socdo.
Dhoolatuskan – oo lagu magacaabo Mosi, oo macnaheedu yahay “Qiqii” Tswana, oo ka mid ah 11 luqadood ee rasmiga ah ee Koonfur Afrika – ayaa lagu arki doonaa 350 ka mid ah askarta Koonfur Afrika oo ay ku tababaranayaan dhiggooda Ruushka iyo Shiinaha.
Dhoolatuskan ayaa ka dhici doona xeebaha Koonfur Afrika inta u dhaxaysa 17-ka ilaa 27-ka Febraayo, waxaana uu dhici doonaa inta lagu guda jiro sannad-guuradii koowaad ee duullaankii Moscow ee Ukraine. “
Maraykanku waxa uu walaac ka qabaa waddan kasta… in uu Ruushka la dhaqmo iyada oo Ruushku uu dagaal ba’an ku hayo Ukraine,” Karine Jean-Pierre, xoghayaha warfaafinta ee Aqalka Cad, ayaa Isniintii tidhi.
Hadalka ka soo yeeray Washington ayaa yimid saacado kadib markii Wasiirka Arrimaha Dibadda ee Ruushka Sergey Lavrov uu kula kulmay Pretoria dhiggiisa Koonfur Afrika, Naledi Pandor.
Dhammaan dalalka ayaa dhoolatus milateri la sameeya saaxiibada caalamka oo dhan,” ayuu Pandor u sheegay suxufiyiinta. “Waa inaysan jirin wax ku qasbaya waddan kasta inuu la dhaqmo la-hawlgalayaasha kale.”
Waxay sheegtay in dhoolatusyadu ay yihiin “qayb ka mid ah habka dabiiciga ah ee xiriirka ka dhexeeya wadamada”, iyada oo raacisay in Pretoria aan loo diidin “xaq u yeelashada” dhoolatusyada.
Lavrov waxa uu sheegay in aan loo baahnayn in waddan uu ka welwelo iyaga.
“Jimicsigayadu waa kuwo hufan,” ayuu u sheegay suxufiyiinta. “Annaga, oo ay weheliyaan shuraakadayada Koonfur Afrika iyo Shiinaha, ayaa bixinnay dhammaan macluumaadka khuseeya.
Ma doonayno inaan kicinno wax fadeexado ah ama iska hor imaad ah. Waxaan doonaynaa oo kaliya in waddan kastaa awood u yeesho inuu helo xuquuqdiisa nidaamyada caalamiga ah sida uu dhigayo Axdiga Qaramada Midoobay.”
Waa maxay mowqifka Koonfur Afrika ee colaadda?
Koonfur Afrika ayaa sheegtay in ay dhexdhexaad ka tahay colaadda, ka dib markii Ruushka uu ciidamadiisa u diray Ukraine 11 bilood ka hor.
Bishii Maarso, Pretoria waxay ka gaabsatay inay u codeyso qaraar Qaramada Midoobay ku cambaareysay duulaanka Ruushka ee Ukraine waxayna ugu baaqday Moscow inay si degdeg ah ula baxdo ciidamadeeda.
Koonfur Afrika, oo ay weheliyaan 34 waddan oo kale, ayaa sidoo kale ka aamusay codbixin ka dhacday Qaramada Midoobay oo lagu cambaaraynayey qabsashadii Ruushka ee dhulalka Ukraine bishii Oktoobar