26- January-2024″
Soomaaliya oo sanadihii dambe sameynaysa isbeddel dhanka awoodda milateriga ah, ayaa kasoo muuqatay liiska ayada oo ka sare martay dalal ku yaalla Ameerika iyo Aasiya.
Global Firepower oo ah shabakad isha ku haysa xogta difaaca caalamka ayaa qiimeyn ay sannadkan ku sameysay 145 waddan, waxaana kasoo muuqatay Soomaaliya oo ay ka hoos mareen dalal sanadkii hore aan ka hooseyn.
Qiimeyntan ayaa diirada lagu saaray in ka badan 60 arrimood sida tirada ciidamada, qalabka milatariga, xasilloonida maaliyadeed, goobta juqraafiyeed iyo agabyada la heli karo, ayada oo qodobbadani ay si wada jir ah u go’aamiyaan dhibcaha PowerIndex, halkaasi oo buundooyinka hoose ay muujinayaan awoodaha ciidan ee xooggan.
Mareykanka ayaa leh ciidamada ugu awooda badan caalamka, waxaana ku soo xiga Ruushka iyo Shiinaha oo ku jira kaalinta 2-aad iyo 3-aad. Hindiya waxa ay soo galeysaa booska 4-aad, sida lagu sheegtay bogga Global Firepower, oo ah shabakad isha ku haysa xogta difaaca caalamka.
Sidoo kale waddamada kale ee soo galay 10-ka ugu sarreya waxaa kamid ah dalalka Kuuriyada Koonfureed, Ingiriika, Japan, Turkiga, Pakistan iyo Talyaaniga.
Soomaaliya ayaa sidoo kale waxay ka gashay liiska awoodaha militari ee adduunka kaalinta 142-aad oo lamid ah kaalintii ay gashay sannadkii tagay balse waxaa kala duwan 3-da waddan ee ka hooseeya.
Sannadkan waxaa ka hooseeya 3 dal oo kala ah Bhutan, Moldova, Suriname. Waddamadii ay sannadkii hore ka sare martay waxaa ka baxay Benin oo sannadkan gashay kaalinta 41-aad.
Waddamadan ay Soomaaliya ka sare martay ayaa waxay ku kala yaallaan qaaradaha Ameerika iyo Aasiya.
Markii hore Soomaaliya waxay meesha ugu hooseysa uga jirtay liiska caalamka muddo dheer, balse waxaa muuqata hadda in saddexdii sano ee lasoo dhaafay ay sare u soo kaceysay.
Si kastaba, waxaa la saadaalinayaa in sanadaha soo socda ay awoodda militari ee Soomaaliya ay sare u kici doonto, maadaama laga qaaday cuna-qabatayntii hubka, ayna yeelatay xaqa soo iibsashada ama siinta hubka, oo markii hore mamnuuc ka aheyd Soomaaliya.