February ” 13″ 2021
Maxkamada Caddaalada Adduunka ICJ ayaa diiday in dib loo dhigo dhagaysiga dacwda badda ee u dhexeysa Soomaaliya iyo Kenya.
Ra’iisul Wasaare ku-xigeenka Xukuumadda Federaalka Soomaaliya ee xilka sii-haya Mahdi Maxamed Guuleed Khadar ayaa sheegay in Maxkamadda ICJ shalay go’aan kama dambeys ah ku gaartay in waqtigii horey u balamisay in la dhageysto kiiska badda la dhageysan doono, isla markaana aanu jirin doonin in dib mar kale loo dhigo.
“Maxkamadda waxa ay go’aan shalay ku gaartay in dhageysiga dacwadda oo horayna ay u muddeysay hase yeeshee Kenya ay codsatay in dib loo dhigo, in aan la aqbaleynin in dib loo dhigo mar dambe. Sidaa daraaddeed dhinacyadu ay u soo diyaargaroobaan 15-19 bisha March ee inagu soo aaddan Insha alla” ayuu yiri Mahdi Guuleed.
Ra’iisul Wasaare ku-xigeenka Xukuumadda Federaalka ayaa carabka ku dhuftay in Maxkamadda ay Somaliya iyo Kenya ku wargelisay in dacwadda la dhageysan doono 15 ilaa iyo 19-ka bisha soo socda ee March, una u soo diyaar garoobaan.
Maxay tahay sababta ay Kenya u dalabatay dib u dhigga
Kenya ayaa maxkamadda ICJ ka dalbatay in dib loogu dhigo dhageysiga furan ee kiiska la xiriira muranka xadka badweynta Hindiya ee ay isku heystaan Soomaaliya, taasoo qorshuhu uu ahaa in la billaabo bisha soo socota. Dowladda Kenya ayaa markii afaraad ka codsatay in dib loo dhigo dhagaysiga dacwada iyadoo ku sababaysa cudurka Covid 19 inuu saameyn ku yeeshay dalkeeda.
