14″ May” 2022″ Muqdisho
Magaalada Muqdisho waxaa ka socda saacadihii ugu dambeeyay ololaha doorashada Madaxtinimada dalka, xili maalinta Axada oo ku beegan 15-ka May la filayo in doorashada madaxweynaha ay ka dhacdo teendhada Afisyooni ee magaalada Muqdisho, waxaana doorashadan tartankeeda iska diiwangeliyay 39 musharax.
Sidoo kale, tartanka doorashada Madaxweynaha waxaa ka tanaasulay musharixiinta kala ah Cabdikariin Xuseen Guuleed iyo Dr. Cabbdinasir Cabdille Maxamed, waana musharixiintii ugu horreeyay ee shaaciyay inay iskaga hareen tartanka loogu jiro Villa Soomaaliya.
Musharixiinta Madaxweynaha ayaa kulamo ka wada Muqdisho, iyagoo kulamo gaar gaar ah la qaadanaya xildhibaannada iyo madaxda maamul goboleedyada kaas oo la xiriira codbixinta madaxweynaha 10-aad ee Soomaaliya.
Guddiga doorashada madaxweynaha ayaa bayaan ay soo saareen ku faah-faahiyey amniga teendhada Afisyooni oo ay ka dhici doonto doorashada madaxweynaha, iyagoo sheegay in amniga teendhada ay si buuxda maalinkaas ula wareegi doonaan ciidamada Midowga Africa ee ATMIS.
Guddiga ayaa shaaciyay in guud ahaan xerada Xalane aan loo oggolyn in wax hub ah lala soo galo gudaha hoolka doorashada ee Teendhada Afisyooni maalinta doorashada.
Sidoo kale, Guddiga ayaa bayaankooda ay Soo saareyn ku sheegay in maalinta doorashada aan la oggoleyn in teendhada lala soo galo telefoonnada, iyaga oo kasoo qeybgaleyaasha ugu baaqay inay bannaanka uga soo tagaan telefoonnadooda.
Musharixiin ka haray tartanka & wararkii ugu dambeeyay doorashada
Waqti waxa uu is guraba In ka badan sanad iyo saddex bilood kadib, muddo xileedkii dastuuriga ahaa ee madaxweynihii 9-aad ee Soomaaliya waxaa maalinta berri ah oo ah 15 may Teendhada afisiyooni ka dhacaysa doorashada madaxweynaha 10aad.
Dareeka guud ahaan Soomaalida iyo beesha caalamka waxa uu ku fooraraa doorashadan oo qabashadeeda maraaxiil kala duwan soo martay oo ay ugu horeysay khilaafkii iyo jiitaankii dowladda dhexe iyo dowlad goboleedyada.
Sidoo kale magaalada Muqdisho ayaa maalmo gashay xaalad adag kadib markii uu ka dhacay kacdoon hubeysan oo looga soo horjeeday muddo kororsi laba sano ahaa oo baaralamaankii 10aad u sameeyeen madaxweyne Farmaajo. Inkastoo markii dambe dib looga laabtay.
Hogaanka doorashada marki lagu wareejiyay RW Rooble waxaa jiray rajo iyo ififaalo muuqatay inkastoo khilaaf iyo kala aragti duwanaan jirtay oo saameyn ku yeelatay horu socodka doorashada.
Hoos ka dhageyso Warbixinta oo dhameysan waxaa soo jeedinaya Xasan Maxamed Xuseen ( X. Nasiib )
Booliska oo Muqdisho ku soo rogay Bandow lagu sugayo amniga doorashada Madaxweynaha.
Taliska Booliska Soomaaliya ayaa bandow kusoo rogay magaalada Muqdisho, kaas oo ka bilaabanaya 9:00 fiidnimo ee caawa, ka hor doorashada madaxweynaha oo dhaceysa Axada berri ah, waxaana Bandowga uu socon doona ilaa lixda subaxnimo ee Isniinta.
Tallaabadan ayuu afhayeenka ciidanka booliska Soomaaliya Gaashanle Cabdifitaax Aadan Xasan ku sheegay in ay tahay mid amni.
“Waxaa lagama maarmaan noqotay in la sugo ammaanka guud ee dalka xilliga lagu jiro doorashada madaxweynaha” ayuu yiri Gaashanle Cabdifitaax.
Waxa uu sheegay in la hakin doono dhammaan dadka iyo gaadiidka xilliga lagu jiro bandowga, wuxuuna sheegay in haddii dadweynaha ay lasoo gudboonaadan xaalado deg-deg ah inay la soo xiriiri karaan booliska, si ay u caawiyaan.
Afhayeenka Booliska ayaa sheegay in Shacabka laga doonayo inay soo adeegtaan galabta illaa caawa ka hor Bandowga inta uusan bilaaban.
Maalinta beri ayaa la filayaa in magaalada Muqdisho lagu qabto doorashada madaxweynaha 10-aad ee Soomaaliya.