Thursday ” September “2” 2021″
NISA oo war ka soo saartay kiiska Ikraan Tahliil Faarax
Hey’adda Nabad sugidda iyo sirdoonka Qaranka Soomaaliyeed ee NISA oo soo saartay warbixin ku saabsan kiiska gabadhii la weysanaa ee Ikraan Tahliil Faarax, oo u gacan gashay dhagar qabayaasha Al-Shabaab isla markaana ay dileen ayaa gal-baariseedka kiiska Ikraan oo faah-faahsan ku wareejisay Hay’adaha ay khuseyso.
Hoos ka akhriso warbixinta NISA
Ujeeddo: Warbixin iyo Tacsi.
Ikraan Tahliil Faarax oo ahayd xubin ka tirsan Hay’adda Sirdoonka iyo
Nabadsugidda Qaranka ayaa warkeeda la waysanaa ilaa 26/6/2021.
HSNQ dabagal ay samaysay oo muddo socday kadib, ayaa lagu helay warbixin muujinaysa in ay u gacan gashay Argagixisada arxan laawayaasha ah ee Al-Shabaab, kadibna ay dileen.
Hay’adda Sirdoonka iyo Nabadsugidda Qaranka ayaa gal-baariseedka kiiska Ikraan oo faah-faahsan ku wareejisay Hay’adaha ay khuseyso. Waxaa sidoo kale ay Hay’adda Sirdoonka Qaranku la wadaagtay warbixintan Qoyskeeda.
HSNQ ayaa uga tacsiyeynaysa qoyska, ehelada, iyo dhammaan xubnaha Hey’adda, falka foosha xun oo ay argagaxisada Alshabab ku dileen Marxuumad Shahiid Ikraan Tahliil. Ilaahay Ha u naxariisto.
Hay’adda Sirdoonka iyo Nabadsugidda Qaranka ayaa ku daba jirta dhagar qabayaashii geystay falkaas arxan darrada ah, sharciga ayaana la hor keeni doonaa Ins壯陽藥 ha Allaah.
INAA LILAAHI WA INAA ILAYHI RAAJICUUN
VOA somali
NISA oo sheegtay in Al-Shabaab ay dileen Ikraan Tahliil Faarax
Hay’adda Nabad-Sugida iyo Sirdoonka Qaranka Soomaaliya ee NISA ayaa sheegtay in kooxda Al-Shabaab ay dileen Ikraan Tahliil Faarax, oo aheyd gabar ka tirsan hay’adda oo la la’aa tan iyo 26-kii June, saacado kadib markii ay VOA shaacisay xogtan.
Ikraan ayaa muuqaal la duubay 26-kii June wuxuu muujinayey inay gaar ka raacday gurigeeda oo ku dhow xarunta NISA ee Muqdisho, waxaana horey waalidkeed ay u sheegeen inay wateen dad ka tirsan hay’adda.
“HSNQ dabagal ay samaysay oo muddo socday kadib, ayaa lagu helay warbixin mujinaysa in ay u gacan gashay argagixisada arxan laawayaasha ah ee Al-Shabaab, kadibna ay dileen,” ayaa lagu yiri qoraal lagu baahiyey warbaahinta dowladda federaalka.
Qoraalka ayaa intaas ku daray “Hay’adda Sirdoonka iyo Nabad-Sugidda Qaranka ayaa gal-baariseedka kiiska Ikraan oo faah-faahsan ku wareejisay hay’adaha ay khuseyso. Waxaa sidoo kale ay Hay’adda Sirdoonka Qaranku la wadaagtay warbixintan qoyskeeda.”
Warka kasoo baxay NISA ayaa yimid saacado un kadib markii barnaamijka Bandhigga VOA, oo soo xiganaya ilo ka tirsan hay’adda uu shaaciyey xogta la xiriirta in Ikraan ay u gacan gashay kooxda Al-Shabaab.
VOA oo la hadashay hooyada Ikraan ayaa sheegtay in warkaas ay u sheegeen xubno ka tirsan hay’adda balse aysan weli rumeysneyn.
Kooxda Al-Shabaab weli kama hadal warka kasoo baxay NISA ee lagu sheegay inay dileen Ikraan.
Barnaamijka Bandhigga VOA hoos ka dhageyso.
https://www.voasomali.com/a/6171402.html
