6- August-2023- BBC
Madaxweyne Xassan Sheekh Maxamuud ayaa shalay gaaray magaalada Dhuusamareeb ee dawlad goboleedka Galmudug.
Ujeedka socdaalkiisa ayaa ahaa in dhamaystirka wajiga koobaad ee dagaalka ka dhanka ah al-Shabaab uu ka bilowdo Galmudug, iyada oo hawlgallo ay ka bilaaban doonaan deegaannada ay gacanta ku hayaan al-Shabaab.
Magaalada Ceelbuur ayaa kamid meelaha sida wayn loogu taamayo in lagala wareego al-Shabaab.
Amniga madaxweynaha
Ka hor inta uusan soo gaarin magalaada Dhuusamareeb madaxweyne Xassan Sheekh, ayaa waxaa soo gaaray magaalada ku dhawaad 400 oo askari oo ka tirsan guutada koofiyo-casta ee ilaalisa madaxda dalka iyo madaxtooyada qaranka.
Ciidankaan oo kaashanaya kuwa Galmudug ayaa la wareegay amniga madaxtooyada Galmdug oo ah halka sida rasmiga ah uu u dagay madaxweynuhu.
Madaxweyne Axmed Cabdi Kaariye Qoorqoor ayaa sida ilo lagu kalsoonaan karo noo sheegeen faarujiyay dhismaha madaxtooyada, si ay xafiis iyo deegaan shaqo ugu noqoto madaxweyne Xassan Sheekh inta uu joogo magaalada.
Dhanka kale amniga magaalada Dhuusamareeb ayaa waxaa qayb laxaad leh ka ciyaaraya ciidamada nabad sugidda qaranka, oo intooda badan ka yimid magaalada Muqdisho.
Ku dhawaad 20 gawaarida ciidamada ee tiknikada, oo ay saaran yihiin ciidamada nabad sugidda ayaa soo gaaray magaalada Dhuusamareeb. Waxay si toos ah uga soo ambabaxeen magaalada Mqudisho.
Taliyaha sirdoonka Soomaaliya Mahad Maxamed Salaad oo isna qaybka ah wafdiga madaxweynaha ayaa saldhig ka dhigtay xaruntii hore ee ay degganayaan hugaamiyaashii Ahlu Sunna.
Dhanka kale ciidmada Galmudug ayaa iyaguna qayb ka ah amniga caasimadda Galmudug, iyaga oo kaalmeynaya ciidamadaan sugaya amniga magaalada.
Magaalada Dhuusamareeb ayaa laga dareemayaa isabaddal dhinac amniga ah iyo ciidamo ku cusub magaalada oo meelo badan gacanta ku haya.
Maxay noqoneysaa shaqada madaxweynaha ee bisha soo socta?
Madaxweyne ku xigeenka Galmudug, Cali Daahir Ciid oo BBC-da la hadlay ayaa sheegay in madaxweynuhu uu usoo guuray caasimadda maamulkaas ee Dhuusamareeb uuna halkaas ka shaqeyn doono.
“Ujeeddadiisu waa xoreynta waddanka inuu u gacan bannaanaado oo kulamadii siyaasadeed iyo howlihii kale ee qaranku uu u hayay awoodda uu ku saaro howlgallada ka dhanka ah al-Shabaab,” ayuu yiri.
Wuxuu intaas ku daray in madaxweynuhu uu muddo ku sugnaan doono halkaas, uuna yahay madaxweynihii ugu horreeyay ee Soomaaliya ee caasimaddii dalka uga soo guura howlgal ka dhan ah al-Shabaab.
Madaxweynaha ayaa Dhuusamareeb joogi doona muddo bil iyo bar ah, sida uu Cali Daahir sheegayna, howlgalka ayuu maamulka Galmudug rajeynayaa in lagu soo afjari doono muddo kooban.
Ciidamada qaranka Soomaaliya ayaa awoodda ugu badan ku yeelaya la dagaallanka al-Shabaab ee gobolka Mudug sida uu sheegay Cali, balse waxaa sidoo kale wehliya kuwa macawisleyda oo garab siinaya.
“Wax ka daba 10,000 oo askari ayay dowladdu u diyaarisay in wajiga labaad ee la dagaallanka al-Shabaab ay ka qeyb qaataan oo guluf xooggan lagu qaado al-Shabaab oo hadda ay awooddoodu wiiqanto,” ayuu yiri.
Wuxuu sheegay in madaxweynuhu uu dagaalkan dhab ka yahay isla markaana uu doonayo in inta ka dhiman sanadka lagu soo afjaro kooxda.
Howlgalkan waxaa sidoo kale qeyb ka ah duqeymo dhanka cirka ah oo ay iska kaashanayaan hay’adda nabad-sugidda Soomaaliya ee NISA iyo saaxiibbada Soomaaliya.
