Ra’iisul Wasaarihii hore ee Xukuumadda Federaalka Soomaaliya Xasan Cali Kheyre ayaa Magaalada Nairobi ee dalka Kenya kulan kula qaatay Xildhibaannada iyo Sanatarada Soomaaliyeed ee Kenya.
Qoraal uu soo saaray Kheyre ayuu ku sheegay in kulankii uu la qaatay Xildhibaannada iyo sanatarada Soomaaliyeed ee dalka Kenya uu ahaa mid wadatashi ah, loogana hadlay arrimo kala duwan oo aan la faah faahin.
Sidoo kale Ra’iisul Wasaarihii hore ee dalka ayaa Xildhibaanada iyo sanatarada uga mahad celiyay sida wanaagsan ee ay dadka Soomaaliyeed had iyo jeer u garab taagan yihiin.
Kheyre ayaa tilmaamay in uu wadatashiyo dhaxal gal ah horey ula yeeshay Shacabka Soomaaliyeed ee uu Magaalada Nairobi kula kulmay iyo Madaxwaynaha Dowladda Djibouti oo qeyb wayn ka qaatay dib-u-dhiska dowladnimadeenna.
“Waxaa sharaf ii ah inaan maanta kulan wadatashi ah la yeeshay xildhibaannada iyo sanatarada Soomaaliyeed ee dalka Kenya. Waxaan uga mahad celiyay sida wanaagsan ee ay dadka Soomaaliyeed had iyo jeer u garab taagan yihiin. Horay waxaan wadatashiyo dhaxal gal ah ula yeeshay Shacabka Soomaaliyeed ee aan caasimadda dalka kula kulmay iyo madaxwaynaha Dowladda walaalaha nahay ee Djibouti oo qeyb wayn ka qaatay welina u taagan dib-u-dhiska dowladnimadeenna” ayuu yiri Kheyre.
