17″ December ” 2022
Lionel Messi ma u jiidi karaa karaa Argentina in ay ku guuleeysato koobka aduunka Mise Kylian Mbappe ayaa ka caawin doona France koobkii labaad oo xiriir ah ? Warbixinta Abdulkadir Farah Dulyar Dheeho.com
Kulanka final-ka koobka adduunka ka hor waxaa jira su,aalo ku saabsan Lionel Messi iyo Kylian Mbappe oo kala hogaaminaya France iyo Argentina waa kee guuleystaha iyo guuldareystaha?
Sheekada ku xeeran Koobka Adduunka ee Qatar waxay ku dhowdahay inay ku soo dhammaato Axada garoonka Lusail Stadium.
Argentina oo koob aduun ay ugu danbeeysay 1986 dii waayihii Diego Maradona, ayaa rajo badan ka qabta 2022-da in uu yahay waqtigeedii iyadoo Messi uu arko in ay tahay fursadii ugu danbeeysay ee uu ciyaaro koobka adduunka Isaga oo u safan qarankiisa
Halka 23-jirka Kylian Mbappe uu fursad u heysto inuu noqdo ciyaaryahankii ugu da’da yaraa ee ku guuleysta mar labaad Koobka Adduunka tan iyo markii Pele uu sidaas sameeyay isagoo 21 jir iyo 25 jir ah
Messi, oo 35 jir ah, ayaa ku guuleystay rikoor todobo abaalmarin ah oo Ballon d’Or ah – oo la guddoonsiiyay ciyaaryahanka ugu fiican adduunka – laakiin waligiis kuma guuleysan abaalmarinta kooxda ugu weyn kubadda cagta.
“Dadku waxay dhahaan France ayaa ugu cadcad, laakiin waxaan ku faaneeynaa faa’iidada inaan heysano ciyaaryahankii ugu fiicnaa abid,” ayuu yiri goolhayaha Argentina Emiliano Martinez.
“Waxaan mar walba jecelnahay inaan maqalno qofka naga soo horjeeda waa kan ugu cadcad sababtoo ah ma dareemayno inaan cidna ka sareeyno ama ka hooseyno.
“Laakiin, sida aan mar walba sheego, waxaan heysanaa ciyaaryahankii ugu fiicnaa ebid, iyo difaac wanaagsan, waxaan heysanaa fursado badan oo aan ku gaarno yoolkeena.”
Maamulaha France Didier Deschamps ayaa kabtan u ahaa xulkiisa ku guuleysiga koobkii adduunka 1998-dii, ka dibna isaga oo tababare ah, waxa uu ku hogaamiyay guulo kale oo ka dhacay Russia afar sano ka hor.
Wuxuu yiri: “Waan garanayaa Argentina, dad badan oo adduunka ah, iyo laga yaabee in qaar ka mid ah dadka Faransiiska ah, ay rajeynayaan in Lionel Messi uu ku guuleysto Koobka Adduunka, laakiin waxaan sameyn doonaa wax walba si aan u gaarno hadafkeena.”
Mbappe, oo 23 jir ah, ayaa isha ku haya guushiisii labaad ee Koobka Adduunka, waxaana uu door weyn ka qaatay inuu France u soo saaro finalka. Hal gool ayuu dhaliyay kulankii ay 4-1 kaga badiyeen Australia iyo labo gool oo ay 2-1 kaga badiyeen Denmark iyadoo France ay u soo baxday wareega 16ka iyadoo ciyaar u dhiman tahay.
Taasi waxay u suurtagelisay Deschamps inuu nasiyo ciyaartoyda, inkastoo guuldarro 1-0 ah ka soo gaartay Tunisia, waxay ku guuleysteen Group D, iyadoo Mbappe uu dhaliyay labo gool oo kale kulankii ay 3-1 ku garaaceen Poland.
Wareega 8-da waxa ay wajaheen xulka England ee Gareth Southgate, waxaana hogaanka u dhiibay Aurelien Tchouameni, balse Harry Kane ayaa gool ku laad ku barbareeyay. Olivier Giroud ayaa hogaanka u dhiibay France waxayna guushu ku raacday 2-1 kadib markii uu Kane khasaariyay rigoore labaad.
France ayaa 2-0 kaga badisay Morocco semi-finalka koobka aduunka iyagoo gaaray finalka koobka aduunka ee 4aad todobadii tartan ee ay ciyaareen, waxaana ay ku guuleysteen tartanka 1998 iyo 2018 iyagoo finalka ku garaacay 2006dii.
Laakin Kutaannada jirrada ayaa caqabad ku ah diyaargarowga Faransiiska
Ciyaaryahanka khadka dhexe ee Adrien Rabiot, daafaca Dayot Upamecano iyo ciyaarayahanka garabka ka ciyaara ee Kingsley Coman ayaa ka mid ah kuwa la dhibtoonaya xanuunka.
“Waxaa na soo maray kiisas dhowr ah oo calaamadaha hargabka u eg,” ayuu yiri Deschamps. “Waxaan isku dayeynaa inaan taxaddarno si uusan u faafin, ciyaartoyduna waxay sameeyeen dadaal weyn oo garoonka dhexdiisa ah, waxaana iska cad in habdhiskooda difaaca ay dhibaato ku qabaan.
Sikastaba ha noqotee waxaan arki doonaa sida ay wax u dhacaan axada