28″ May “2021” Friday “Muqdisho
Guddoomiyaha Gobolka Banaadir ahna Duqa Muqdisho Mudane Cumar Maxamuud Maxamed (Cumar Filish) ayaa Xarunta Aqalka Dowlada Hoose ee Xamar ku qaabilay wafdi uu hoggaaminaayay Wasiirka Iskaashiga iyo Horumarinta Caalamiga ah ee dalka Sweden Per Olsson Fridh oo booqasho ku jooga Magaalada Muqdisho .
Kulankaan waxaaay goob-joog ka ahaa u qaabilsanaha Wasaaradda Arrimaha Dibadda Sweden ee dhinaca Africa, Safiir Ku xigeenka Sweden, Xoghayaha Guud ee Maamulka Gobolka Banaadir, Agaasimeyaal iyo La-taliyeyaal.
Guddoomiyaha Gobolka Banaadir ayaa ugu horeyn waxa uu ugu Mahadceliyay Dowlada Sweden Taageerida ay la garab taagan tahay Soomaaliya, isigoo dhinaca kale ugu warbixiyay Horumarada ka socda Caasimada Soomaaliya, arrimaha narakacayaasha, shaqo abuurka dhalinyarada iyo qorshaha Maamulka Gobolka Banaadir ee dhinaca horumarinta iyo adeegyada Bulshada.
Wasiirka ayaa bogaadiyay Horumarada muuqda ee ka socda Caasimada, isigoona ku amaanay Maamulka Gobolka Banaadir Howlaha dib-u-dhis iyo midka adeegyada Bulsho ee ka socda Gobolka Banaadir. waxaana uu Wasiirka Iskaashiga iyo Horumarinta Caalamiga ah ee Sweden Per Olsson Fridh ballan qaaday in ay si dhaw ula shaqeyn doonaan Maamulka Gobolka Banaadir isla markaana ay ka taageeri doonaan xagga horumarinta, dib-u-dhiska iyo adeegyada Bulshada.
Ugu danbeyn Duqa Muqdisho ayaa waxa uu Wasiirka Guddoonsiiyay haddiyado isugu jira shahaado sharaf iyo dharka hiddaha & dhaqanka Soomaaliya.
Ra’iisul Wasaare Rooble oo la kulmay Wafdi ka socda dalka Sweden
Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble ayaa kulan la qaatay Wasiirka Iskaashiga iyo Horumarinta Caalamiga ah ee dalka Sweden Mudane Per Olsson Fridh oo booqasho ku yimid dalka.
Ra’iisul Wasaare Maxamed Xuseen Rooble oo kulan ka ay ku weheliyeen Madaxda Dowlad-goboleedyada iyo Maamumlka Gobolka Banaadir ayaa uga mahadceliyay dowladda Sweden taageeradeeda dalkeenna ay la garab taagan yihiin, gaar ahaan dhinacyada horumarinta, siyaasadda iyo dhaqaalaha.
Sidoo kale, Ra’iisul Wasaaraha iyo Madaxda kulanka ku wehelisay ayaa soo bandhigay muhiimadda ay leedahay in lagu garab istaago shacabka Soomaaliyeed geeddi socodka dimuqradiyadeed iyo dowlad dhiska dalka.
Dhankiisa, Wasiirka ayaa bogaadiyay heshiiskii uu hormuudka ka ahaa Ra’iisul Wasaaraha ee maanta laga gaaray arrimaha doorashooyinka dalka, isagoo soo bandhigay sida ay uga go’an tahay taageeridda dhaqan gelinta heshiiska doorashooyinka ee la saxiixay.
