22- July-2023
Ugu yaraan lix tahriibayaal ah ayaa dhintay kadib markii doonidii ay la socdeen ay kula degtay xeebaha dalka Marooko, wakaaladda wararka ee MAP ayaa Jimcihii ku sheegtay boggeeda Fa-cebook.
Wararka ayaa waxay intaa ku dartay in doonida ay ku dhufatay dhagxaan, lixdii qofna ay ku qaraqmeen. Afartan iyo siddeed kale ayaa badbaaday.
Marooko waxay ka mid tahay gobollada inta badan loo isticmaalo marinka muhaajiriinta aan joogtada ahayn sababtoo ah juquraafi ahaan waxay u dhowdahay xeebaha Yurub.
In ka badan 30 muhaajiriin ah ayaa bishii hore ku dhintay xeebaha Morooko ka dib markii dooni yar oo ku sii jeeday jasiiradaha Canary ee Spain ay degtay , laba hay’adood oo diiradda saara socdaalka, ayaa ku dhaleeceeyay Spain iyo Morocco inaysan horay u soo faragelin si loo badbaadiyo rakaabka doonta degtay .
Afhayeenka Xuduudaha Socodka Helena Maleno ayaa barteeda twitter-ka ku sheegtay in 39 qof ay qarqoomeen, iyadoo aan bixin faahfaahin dheeraad ah, halka Alarm Phone, oo ka shaqeysa shabakad ka gudubta Yurub oo taageerta howlaha samatabbixinta, ay sheegtay in 35 qof la la’yahay.
Musiibadan ayaa dhalisay dhaleecayn uga timid dadka u dooda xuquuqda muhaajiriinta oo sheegay in doonidu ay ku sugan tahay gobolka baadi-goobka iyo samata-bixinta ee Spain sida waafaqsan sharciga caalamiga ah, taasoo la micno ah in Madrid ay ahayd inay hogaamiso howlgalka halkii ay ka ahaan lahayd Rabat.
Markii ay quustay, doontu waxa ay ku jirtay biyaha xeebaha Galbeedka Saxaraha. Inkastoo Marooko ay maamusho inta badan dalkii Isbaanishku gumaysan jiray, haddana madax-bannaanideeda ayaa weli lagu muransan yahay, Qaramada Midoobayna waxay ku tilmaantay dhul aan iskeed isku xukumin.
Wakaaladda wararka ee Spain ee EFE ayaa ku warantay in markab adeega samatabbixinta ee Isbaanishka, Guardamar Caliope, uu ku dhawaad 46 kilomitir, shiraacan saacad ku dhow yahay, kana fogaa doonta fiidnimadii Talaadada.
