Friday “3” Sebtember”2021″ Jowhar
xildhibaano lagu dhaawacay magaalada Jowhar
Wararka ka imanaya magaalada Jowhar ee xarunta Dowlad Goboleedka Hirshabele ayaa sheegaya in lagu weeraray bam guri ay degenaayeen qaar ka mid ah xildhibaanada Baarlamaanka Hirshabelle
Wararka ayaa waxa ay sheegayaan in weerarka bambaanada ah uu ku dhaawacmeen saddex ka mid xildhibaanada baarlamaanka Hirshabelle.
Bamka kadib ayaa la maqlay rasaas badan oo ay fureen qaar kamid ah ciidamada ammaanka ee magaalada Jowhar oo halkaas ilaalo ka hayay.
Saddexda xildhibaan ee ku dhaawacantay weerarkan bambaanada ah ayaa magacyadooda lagu kala sheegay Aadan Maxamed Muuse,Duwane Faarax Cali iyo Cismaan Cabdulaahi Dhoore.
Wararka oo weli soo baxaya ayaa waxa ay sheegayaan in halka bamka lagu tuuray ay tahay xaafad ay si weyn u degen yihiin musharaxiinta iyo xildhibaanada baarlamaanka ayna ka fogeyn hotelada waaweyn ee magaalada.
Magaalada Jowhar ayaa isku diyaarineysa doorashada Senatarada Aqalka sare oo maalmaha soo socda, iyadoo magaalada ay buux dhaafiyeen Musharaxiin, siyaasiyiin iyo dad kale oo qeyb ka ah ololaha loogu jiro Doorashada Aqalka Sare.
Dad lagu afduubtay Beledweyne oo Xildhibaan Mahad Salaad baaq ka soo saaray
Xildhibaan Mahad Salaad ayaa ugu baaqay Maamulka Beledweyne inay ka hortagaan dhalinyarada la sheegayo inay bilaabeen dad inay ka qafaashaan magaalada Baladweyne kuwaasoo hayb la ah Taliyaha Nabad sugida.
Wararka ayaa waxa ay sheegayaan in magaalada Beledweyne in rag hubeysan ay ku afduubteen xaafada Hawlwadaag wiil dhalinyaro ah oo magaciisa lagu sheegay Cabdiqafaar Xaaji Cumar.
Muuqaal muujinya afduubka dableeyda u geysteen wiilka dhalinyarada ah oo lasoo dhigay baraha bulshada ku xariirto ee Internetka ayaa waxaa ka dhex muuqday Cabdiqafaar Xaaji Cumar oo si hanjabaad leh loo weydiinayo su’aalo, kaaso sheegaya inuu kasoo jeedo qabiilka Reer Awxasan oo dhalasho ahaan uu kasoo jeedo taliyaha hay’adda NISA Fahad Yaasiin.
Hase yeeshee Xildhibaan Mahad Salaad ayaa bartiisa facebook waxa uu ugu baaqay maamulka Beledweyne inay ka hortagaan afduubka.
Qoraalka u soo dhigey bartiisa facebook Mahad Salaad ayaa waxaa uu u qornaa sidan;
“Liiska dilka Ikraan Tahliil wuxuu ku cadyahay Fahad Yaasiin, isaga ayaana loo ciqaabi doonaa inshaa’allaah. Waxa la ii sheegay inuu u cararay dalka Turkiga, halkaasna uu ku dhuumaalaysanayo laakiin lagama hari doono inshaa’allaah, ilaa maxkamad laga soo taagayo, lana marinayo ciqaab u dhiganta dambiga uu ka galay walaasheen Ikraan iyo qoyskeeda!.
Walaalaha reer Hiiraan gaar ahaan Beesha Gaaljecel waxaan ka codsanaynaa in ay ka hortagaan dhalinyarada la haybta ah ee la sheegayo in ay dad ka qafaalanayaan magaalada Baladweyne. Sababtoo ah dambigaan waxaa geystay qof ee qabiil ma galin. Isaga ayaana lagula xisaabtamayaa.
Ficillada nuucaan oo kale ah waxay naga marin habaabinayaan wadada aan ku socono ee Ikraan xaqeeda aan ku baadi goobeyno, sidoo kalena waxay naga sii jeedinaysaa indhaha shacabka Soomaaliyeed ee nala duuban si Ikraan cadaalad u hesho, dambiilihii ficilkaan foosha xun geystana gacanta lagu soo dhigayo!
